Paris Hilton in Japan aangehou
2010-09-22 12:24
Kaapstad – Die sosiale vlinder Paris Hilton is toegang tot Japan geweier ná haar arrestasie weens dwelmverwante aanklagte.
Hilton, wat skuld erken het op twee aanklagte vir die besit van dwelms en omdat sy haar teen ‘n beampte verset het, het Maandag in die hof in Las Vegas verskyn nadat kokaïen in haar handsak gevind is.
Sy word tans in ‘n hotel by Tokio se lughawe aangehou nadat sy deur immigrasie-beamptes ondervra is.
Volgens Paris se woordvoerder het immigrasie-beamptes haar ondervra nadat sy vir besigheidsverpligtinge in Japan aangekom het wat maande vooruit reeds beplan is.
“Paris wou haar verpligtinge nakom en nie haar Asiatiese aanhangers teleurstel nie.”
Sy moet egter nog besluit of sy steeds gaan probeer om in die land te kom en of sy na Amerika gaan terugkeer.
Hilton sou na haar besoek aan Japan ook Djakarta en Indonesië besoek om ‘n Paris Hilton-winkel oop te maak.
Sy is met 'n opgeskorte vonnis van 'n jaar vrygelaat en kan tronkstraf opgelê word indien sy haar voorwaardes verbreek.
Sy moet ook ‘n teen-dwelmprogram bywoon, ‘n $2000 (sowat R 14 000) boete betaal en ongeveer 200 ure gemeenskapsdiens voltooi.
- Volg Nuus24 op Twitter.
- SAPA