Paleis laat vaar klag oor Harry se naakfoto's

2012-09-28 22:36

Los Angeles – Prins Harry sal nie voortgaan met 'n klag by die Britse Pers-klagtekommissie oor die publisering van sy naakfoto's nie, het St. James-paleis gesê.

The Sun het die foto's gepubliseer wat in 'n hotelkamer geneem is ten spyte van waarskuwings deur die koninklike familie se prokureurs dat dit 'n skending van sy privaatheid is.

Die foto's is oorspronklik op die Amerikaanse skinderwebwerf TMZ gepubliseer.

"Nadat ons die saak vir 'n paar weke oorweeg het, het ons besluit om nie met die klag voort te gaan nie," het 'n woordvoerder vir die paleis gesê wat die prins van Wallis en sy seuns se sake behartig.

Omdat die prins "gefokus" is op sy ontplooiing in Afganistan, gaan dit nie van pas wees om voort te gaan met 'n klag rakende sy privaatlewe nie, het sy gesê.

Die foto's is geneem nadat Harry en sy gevolg in 'n kroeg gekuier en meisies na sy luukse hotelkamer genooi het.

Dinge in die kamer het warm geraak toe die groep 'n ontklee-speletjie gespeel en almal later kaal was. Sommige van die partytjiegangers het foto's geneem van die mannewales.

Daar word beweer die foto's is met 'n selfoon se kamera geneem.

– BBC.

– Volg Nuus24 op Twitter.