Oudisies vir SA Idols begin
2011-02-07 18:00
Kaapstad – Suid-Afrika se grootste realiteitsprogram, M-Net Idols, se sewende seisoen begin eersdaags met oudisies wat binnekort landwyd afskop.
Die radiopersoonlikheid Unathi Msengana het in Januarie opslae gemaak toe sy die omstrede Mara Louw as beoordelaar vervang het.
Msengana gaan nou saam met Randall Abrahams en Gareth Cliff op ‘n landwye soektog vir Suid-Afrika se volgende Idol.
Pierre Cloete, M-Net se kanaalbestuurder, het gesê Idols gaan vanjaar vir die eerste keer na Polokwane in die hartjie van Limpopo.
Die oudisies gaan ook op Saterdae gehou word om vir so veel as moontlik kandidate die geleentheid te gee om die oudisies by te woon.
Die oudisies sal in Februarie en Maart plaasvind.
Kaapstad: 12 Februarie, Kaapstadse Internasionale Konferensiesentrum
Polokwane: 26 Februarie, Peter Mokaba Stadion
Durban: 5 Maart, Moses Mabhida Stadion
Soweto: 26 Maart, Dobsonville Stadion
Johannesburg: 2 April, Montecasino
Deelnemers word versoek om so vroeg as moontlik by die verskeie oudisies op te daag en moet hul identiteitsdokument saambring. Deelnemers moet ook beskikbaar wees om die volgende dag teruggeroep te word.
Oudisies is net vir Suid-Afrikaanse burgers tussen die ouderdom van 16 en 30 oop.
- Kliek hier vir meer inligting.
- Volg Nuus24 op Twitter.