Oud-sportster moet R4 milj. vir onderhoud betaal

2012-12-07 10:03

Orange, Kalifornië – Die voormalige professionele basketbalster Dennis Rodman is aangekla van minagting van die hof en beveel om $500 000 (sowat R4,3 miljoen) in onderhoudsgeld aan sy eksvrou te betaal.

'n Prokureur vir Rodman se eksvrou, Michelle, het Donderdag gesê die flambojante basketbalspeler is ook 'n informele proeftydperk opgelê.

City News het berig dat Rodman tronkstraf opgelê kan word indien hy nie die geld betaal nie.

Rodman en sy eksvrou moet nog toesigreëlings vasstel.

'n Verhoor is vir 24 Januarie geskeduleer, maar die partye hoop om die dispuut voor daardie tyd op te los.

Rodman is in Mei beveel om 104 uur van gemeenskapdiens te doen nadat hy versuim het om onderhoudsgeld te betaal.

Sy prokureur, Linnea Willis, was nie onmiddellik beskikbaar vir kommentaar nie.

– Volg Nuus24 op Twitter

- SAPA