Oscars die domste ding op aarde – akteur

2012-10-19 17:52

Los Angeles – Joaquin Phoenix dink die Oscars is die domste ding op aarde.

Die Walk the Line-akteur stem glad nie saam met die jaarlikse Oscar-toekennings nie, ten spyte daarvan dat hy al twee keer vir die toekenning benoem is. Phoenix voel dit is onregverdig dat verskillende filmrolle met mekaar vergelyk word.

Die 37-jarige ster was benoem as beste ondersteunende akteur vir sy rol in Gladiator en die beste akteur vir sy rol as Johnny Cash in Walk the Line. Hy voel egter die eer wat hy vir die rolle gekry het, het hom ontsenu.

“Ek dink dit is strooi. ‘n Pot strooi en ek wil nie deel daarvan wees nie. Ek glo nie daarin nie,” het Phoenix aan die Interview-tydskrif gesê.

“Dit is ‘n wortel, maar dis die slegste wortel wat ek al ooit geproe het. Ek soek nie hierdie wortel nie. Dit is heeltemal subjektief. Om mense teen mekaar te laat staan. Dit is die domste ding in die wêreld.”

“Dit was een van die ongemaklikste oomblikke van my lewe toe Walk the Line deur al daardie toekennings gegaan het. Ek wil nooit weer so ‘n ervaring beleef nie. Ek weet nie hoe om dit te verduidelik nie. Dit is nie dat ek dink ek is beter as dit nie, maar ek wil net nooit gemaklik met so iets raak nie.”

Ten spyte van sy besware, word Phoenix se nuutste rol in The Master reeds hoog geag en hy kan dalk weer benoem word. 
 
– Volg Nuus24 op Twitter