Oscar-benoemde by lughawe aangehou
2013-02-21 16:01
Los Angeles – ‘n Palestynese Oscar-benoemde regisseur is met sy aankoms by Los Angeles se internasionale lughawe aangehou, het Michael Moore, ‘n Oscar-bekroonder regisseur, Woensdag gesê.
Emad Burnat, mede-regiseur van die Oscar-benoemde dokumentêr 5 Broken Cameras, is Dinsdagaand saam met sy gesin by die lughawe aangehou.
Burnat is die eerste Palestynse burger ooit om vir ‘n Oscar benoem te word. Sy dokumentêr beeld ‘n Palestynse dorpie se stryd teen Israel se weermag uit.
Moore, regisseur van bekende dokumentêre soos Fahrenheit 9/11 en die Oscar-bekroonde Bowling For Columbine, het gesê dat Burnat na 90 minute vrygelaat is.
“Die doeanebeamptes kon glo nie verstaan hoe ‘n Palestynse burger vir ‘n Oscar benoem kan word nie. Emad, sy vrou en hul agtjarige seun is aangehou en daar is vir hulle gesê dat hulle nie die korrekte uitnodiging het nie,” het Moore getwiet.
“Ek het amptenare van die Oscar-toekennings gebel wat hul prokureurs gekontak het. Ek het vir Emad my telefoonnommer gegee en vir hom gesê hy moet ‘n paar keer my naam noem. Na 90 minute het hulle besluit om hom en sy gesin vry te laat sodat hy die week in LA kan bly en die Oscars kan bywoon. Welkom in Amerika.”
– Volg Nuus24 op Twitter
- Sapa-DPA
