Oproer oor Julia Roberts-film
2009-10-16 10:27
Denpassar, Indonesië – Woedende Indonesiese dorpenaars eis duisende dollars van 'n produksiespan wat Julia Roberts se nuwe rolprent Eat, Pray, Love gaan verfilm.
Verleë beamptes het gesê toe die span in die dorpie Bentuyung in Bali aangekom het, ‘n maand voor hulle met die verfilming sou begin, het inwoners paaie versper en $32 000 dollars (sowat R235 000) geëis.
“Daar was ‘n misverstand en die produksiespan het in 20 vragmotors daar aangekom, vroeër as hul geskeduleerde verfilming wat op 10 November sou begin. So die inwoners het aanstoot geneem en die paaie geblokkeer,” het Tjokorda Oka Artha Ardana Sukawati, distrikshoof gesê.
“Die inwoners het vir 300 miljoen roepia gevra voor die span die gebied vir verfilming kon gebruik. Ek was in die verleentheid gestel en het aan hulle gesê dit is onaanvaarbaar.”
Volgens Oka Artha Ardana Sukawati is die probleem opgelos en is die produksiespan in die dorp toegelaat. Maar hy sê hy sal graag hiervoor wil opmaak met Roberts, deur haar vir middagete by sy huis te nooi.
“Alles is nou in orde en die inwoners verstaan. Hier was al baie plaaslike en internasionale rolprente geskiet sonder enige probleem.”
Die rolprent is gebasseer op Elizabeth Gilbert se gedenkskrif.
- Sapa-AFP