Oprah laat sak die gordyne met ’n groot makietie in Chicago
2011-04-29 09:12
Los Angeles. – Die kletskoningin Oprah Winfrey sal op 17 Mei ’n gratis afskeidspartytjie in Chicago se United Center aanbied in afwagting op die finale episode van haar gewilde kletsprogram, het die program se vervaardigers Donderdag gesê.
Beroemdes sal Oprah en haar sowat 20 000 gaste in die basketbal-arena kom verras. Die byeenkoms, genoem “Surprise Oprah! A Farewell Spectacular”, sal in twee dele op 23 en 24 Mei uitgesaai word.
Die laaste episode van The Oprah Winfrey Show word op 25 Mei uitgesaai.
“Soos die meeste kykers weet, is dit nie een van Oprah se gunsteling-dinge om verras te word nie,” het Sheri Salata, uitvoerende vervaardiger, in ’n verklaring gesê.
“In die gees van ons finale reeks het sy ’n ongewone uitsondering gemaak en ons sal die meeste van dié geleentheid maak.”
Kaartjies is slegs beskikbaar op die webblad oprah.com.
Winfrey gaan in die toekoms meer aandag skenk aan haar eie kabelnetwerk, OWN, ’n gesamentlike projek met Discovery Communications.
- Reuters Life!