Onmin in Kinderkoor oor versoek van Rieu
2010-06-03 08:41
Volksblad
Bloemfontein – Groot ontevredenheid heers onder ouers van sekere lede van die Bloemfonteinse Kinderkoor nadat die internasionaal bekende Belgiese violis André Rieu daarop aangedring het dat die helfte van die koorlede wat saam met hom toer, swart moet wees.
Die kwessie is gisteroggend onder Volksblad se aandag gebring deur ’n ouer van ’n koorlid wat anoniem wil bly.
Dié ouer het aan Volksblad gesê heelwat ouers voel net soos sy. SMS’e het behoorlik tussen ouers gevlieg soos wat hulle hul ontsteltenis oor die saak te kenne wou gee, het sy gesê.
Volgens haar is die algemene gevoel onder die ouers dat die Rieu-versoek uiters onbillik is. Dit kos baie geld om ’n kind in dié koor te hê. Noudat so ’n wonderlike geleentheid hom voordoen, kan net ’n paar dit meemaak.
Die koor, wat vroeër vanjaar deur Rieu bestempel is as die beste kinderkoor met wie hy nog saamgewerk het, vertrek einde vanjaar na België om saam met hom daar op te tree.
Rieu het ook versoek dat net 30 lede van die koor van 64 saam met hom optree.
Boet Troskie, beskermheer van die koor, sê die koor het geen sê in dié besluit gehad nie.
“Rieu beplan om ’n DVD te maak. Óf ons gebruik die geleentheid en verskyn daarin, wat voordelig vir Bloemfontein is, óf ons sê nee daarvoor.”
Die koor, wat gewoonweg sy toergroep volgens senioriteit kies, moes van sy senior koorlede oor die hoof sien om aan Rieu se versoek te kan voldoen.
Dr. Huibrie Verster, dirigent, sê “dit was nie oor die (gehalte van) stemme nie, daar was net nie genoeg plek nie”.
Illoné Fourie (17) is een van die senior koorlede wat ontevrede is omdat sy haar plek nou kwyt is.
“Ek is vyf jaar lank in die koor. Ek dink regtig nie dit is regverdig nie.”
Illoné sê sy was ook vanjaar deel van al die vertonings wat Rieu met die koor in Suid-Afrika gedoen het.
Verster sê ’n vergadering gaan gereël word om Rieu se versoek aan die koorlede te verduidelik.
Volg Nuus24 op Twitter
- Volksblad