Ondersoek kom oor naakfoto's van Kate

2012-09-18 15:27

Parys – Franse staatsaanklaers het Dinsdag gesê hulle het begin met 'n ondersoek om vas te stel of 'n skindertydskrif en 'n fotograaf die wet oortree het deur naakfoto's van prins William se vrou, Catherine, te publiseer.

Die aankondiging van die voorlopige kriminele ondersoek kom slegs 'n paar uur nadat 'n Franse hof beslis het dat die herverkoop van die foto's, wat eerste deur die tydskrif Closer gepubliseer is, verbied moet word.

Dit sal die staatsaanklaer toelaat om te besluit of daar met 'n volle ondersoek voortgegaan moet word ná klagtes dat die neem en publisering van die foto's die paartjie se privaatheid geskend het.

Die staatsaanklaer sal ook moet besluit wie krimineel vervolg gaan word.

Die staatsaanklaer se kantoor in Nanterre, Parys, sê die koninklike paartjie het 'n aanklag teen onbekende mense ingedien. 

Geen koerant of tydskrif in Brittanje het al laat deurskemer dat hulle die naakfoto's wil publiseer nie.

– Volg Nuus24 op Twitter.

- Sapa - AFP