Ondersoek begin ná konsert-tragedie
2012-11-08 11:10
Video - Tragedie by konsert
'n Vrou is dood en 19 mense is beseer ná steierwerk buite die Kaapstad-stadion ingegee het voor 'n konsert van die groep Linkin Park.
KYK
Johannesburg – Die musiekgroep Linkin Park het Donderdag hul medelye betuig met die familie van 'n vrou wat dood is toe steierwerk buite die Kaapstad-stadion ingegee het kort voor 'n vertoning.
Die groep het hulle in 'n verklaring op hul webwerf ook gedistansieer van die "borg of entiteit" wat die struktuur opgerig het.
"Ons is ná ons vertoning... by die Kaapstad-stadion in kennis gestel dat verskeie mense beseer is toe 'n advertensietoring wat in die parkeerterrein buite die stadion deur Lucozade opgerig is, ineengestort het," het die groep se verklaring gelui.
"Ons wil ons diepe hartseer en kommer uitspreek oor die wat beseer is en wil diepe medelye betuig met die familie van die aanhanger wat dood is as gevolg van haar beserings.
"Hoewel ons geen verhouding het met die borg of entiteit wat verantwoordelik was vir die oprigting van die struktuur nie, neem ons die veiligheid van ons aanhangers baie ernstig op en ons gedagtes is met al die mense wat deur hierdie tragedie geraak is."
Kylie Hatton, 'n woordvoerder vir die Stad Kaapstad, het vroeër bevestig dat een mens dood is weens die beserings wat sy opgedoen het toe die steierwerk in 'n sterk wind ineengestort het.
Die vrou is dood ná sy na die Christiaan Barnard-gedenkhospitaal geneem is.
Altesaam 19 mense is ook in die voorval beseer, en 12 van hulle moes in 'n hospitaal opgeneem word.
Hatton het gesê die polisie ondersoek tans die toneel.
Die tydelike struktuur was buite die stadion opgerig. Dit is voor die konsert ondersoek, en veilig verklaar.
Hatton het gesê amptenare sal die ondersoek gebruik om onder andere vas te stel of die regte goedkeuringsprosedure gevolg is.
Big Concerts, wat die konsert aangebied het, het op sy Facebook-blad sy "diepste simpatie en medelye" met die slagoffer se familie en die beseerdes betuig.
"Ons wil Stad Kaapstad, die Suid-Afrikaanse polisiediens, en al die paramedici, dokters, en rampbestuurpersoneel bedank vir hulle flinke en professionele reaksie op die voorval."
Linkin Park sal op 10 November in Johannesburg optree.
– Volg Nuus24 op Twitter.
- SAPA
