Nuwe dokters jaag hartklop op
2009-07-22 08:45
Johannesburg- Amanda de Lange het vir Hykie Berg en Karl Thaning 'n paar vrae gevra.
HYKIE BERG
Dis lekker om jou in Binnelanders te sien. Was jy nie lanklaas voor die kameras nie?
Ek was lanklaas voor die kameras; seker so ’n jaar gelede. Ek het ’n klein rolletjie in Getroud met rugby gehad, maar het ’n break van die bedryf geneem. Ek wou ander goed gaan explore, maar het gou agtergekom dat ’n skoenmaker hom by sy lees moet hou. En dat jy altyd moet doen wat vir jou lekker is.
Hoe ervaar jy die lewe as ’n sepie-akteur? Wat is lekker/sleg daaraan?
Dit is moeilik om dit te beskryf. Ek sien myself nie as ’n spesifieke soort akteur nie. Ek vat nie die karakter saam met my huis toe nie, alhoewel daar aspekte van die dag is wat jy saamdra huis toe. Maar ’n mens neem ’n hot shower of ’n lekker bad en dan is alles beter. Ek is in die eerste plek ’n akteur, ongeag die genre. Ek sien myself as ’n performer. Ek weet ook waar om die streep tussen my private lewe en my professionele lewe te trek. Wat lekker is, is die spontaniteit van jou audience members – “you get a lot of real-ness”. Dis lekker om te sien dat fans na jou werk kyk en die karakter waardeer. Kuns is een van die dinge wat die wêreld se moraal bepaal of ophef, want dit is entertainment/ontvlugting/ontlading. Wat sleg daaraan is, is die inconsistency van werk. Jy klim nooit ’n corporate ladder nie. Jy moet leer om dikvellig te wees en om te kan budget met jou geld.
Vertel ons bietjie wat ons van Conrad te wagte kan wees.
Hy is baie ambisieus, ontsaglik intelligent en ’n ongelooflike chirurg. Maar hy laat nie mense oor hom loop nie en hy fight vir dit wat hy wil hê. Hy laat niks in sy pad staan nie en dit gaan die audience bietjie gooi. Conrad het ’n liefdevolle hart, maar dit beteken nie dat jy met hom kan mors nie.
En gaan ons die vonke sien spat tussen jou karakter en At Koster?
Die vonke spat definitief. Met iemand soos At is daar nie ’n kwessie dat die vonke nie kan spat as hy oor jou kom nie. Conrad gaan vir At van sy eie medisyne teruggee, en dit is iets wat At nie maklik gaan kan hanteer nie – inteendeel, hy gaan elke oomblik haat.
Wat is die slegste ervaring wat jy al persoonlik met ’n dokter gehad het?
Toe ek op skool was, het ek ’n stukkie lood onder my duim se nael gehad wat verwyder moes word. Dit was nadat ’n passer se punt daarin afgebreek het – moenie vrae vra nie. Die dokter moes lokale verdowing onder my nael inspuit, van albei kante af, tot in die middel van die duim. Dit was verskríklík seer. Die dokter moes my kalmeer en inspuit en die passer se punt verwyder – en dit is ’n pynlike, slegte proses om deur te maak.
KARL THANING
Jy het drama en rolprentwerk oorsee studeer en ook daar gewerk. Hoe is dit om weer in Suid-Afrika te werk?
Ek het heelwat flieks gedoen wat hier geskiet is vir verspreiding oorsee en net teater gedoen wanneer ek oorsee was. Ek het nog nie plaaslik teaterwerk gedoen nie. Ek geniet dit om hier te werk, want die inhoud is baie belangriker.
Sal jy graag eendag wil terugkeer oorsee en vir jouself daar ’n naam maak of is jy permanent terug in die land?
Vir nou is ek hier. My belange is Suid-Afrikaans hoewel ek nie nee sal sê vir daardie soort geleenthede as hulle opduik nie!
Feast of the Uninvited was ’n redelik intense drama en nou is jy op die stel van ’n sepie. Hoe verskil die twee van mekaar?
Die belangrikste verskil is tussen ateljeewerk en by spesifieke bestemmings skiet. Feast het ’n meer onmiddellike begin, middel en einde gehad. Hoewel sepie-werk meer aaneenlopend is, hou die gehalte van die akteurs dit baie dieselfde. Jy sal dalk ’n paar bekende gesigte opmerk oor die volgende paar maande as jy na Feast of the Uninvited gekyk het.
Vertel ons bietjie meer van Nathan en wat ons alles van hom kan verwag.
Nathan is ’n baie energieke chirurg wat toegewyd is aan sy lewe en werk. Hy sal nie ongemerk verbygaan nie, want hy is nie daar om vriende te maak nie. Hy gaan dinge bietjie omdolwe in die Binneland-kliniek. Soos ek is Nathan ’n Kapenaar en hy is Engels; dus sal hy anders as die ander karakters wees.
Wat is vir jou die heel lekkerste ding om te doen wanneer jy tyd vir jouself het?
Ek het deesdae nie juis baie tyd vir myself nie omdat my program by Binnelanders so besig is. Maar wanneer ek kan, is ek lief daarvoor om te fliek en tyd saam met vriende deur te bring.
# Binnelanders word weeksaande om 18:00 op kykNET en M-Net uitgesaai.