Nuwe TV-diens knak onder oproepvolumes
2010-05-03 06:51
Johannesburg. – TopTV se skakelbord het eergister, sy eerste dag van beskikbaarstelling, onder ’n te hoë oproepvolume geknak.
“Daar is heelwat gefrustreerde inbellers,” het me. Melinda Connor, publisiteitsbestuurder, gistermiddag gesê.
“Mense se oproepe word afgesny of nie beantwoord nie. Ons 30 skakelbordoperateurs hanteer meer as 1 000 oproepe per uur. Kliëntedienspersoneel kom nie by al die oproepe en e-posse uit nie.”
Mense wat dekodeerders wil koop, moet ook eers wag, aangesien al 50 000 Top TV-dekodeerders wat sedert eergister te koop was, dieselfde dag nog opgeraap is, het Connor gesê.
Die dekodeerders was teen R499 in onder andere Pep, Game, Makro, Dion, sekere Jumbo Cash & Carry-winkels, Brown’s, Weirs en ook House & Home landwyd te koop.
Volgens Connor beteken dit dat die uitsaaier DStv se eerste plaaslike mededinger binne die volgende paar dae 50 000 intekenare sal hê.
Die prys van die dekodeerder sluit die satellietskottel sowel as die installasiekoste in.
Kykers wat dekodeerders gekoop het, moet as intekenare registreer. In dié proses kies hulle ook watter pakkette hulle wil hê.
Volgens Connor is dit nog nie bekend hoeveel mense al geregistreer het nie. Sy kan ook nog nie sê watter pakkette die gewildste is nie.
Sy het gesê mense wat nie van die eerste dekodeerders kon kry nie, kan bestellings by die betrokke winkels plaas.Sanri van Wyk
- Die Burger