Nuwe Bond-roman kom in September
2013-02-19 13:13
Londen – ‘n Nuwe James Bond-roman wat deur die Britse skrywer William Boyd geskryf word, sal op 26 September 2013 vrygestel word, het die uitgewers Jonathan Cape Maandag bekendgemaak.
Die boek, wat nog nie ‘n titel het nie, speel in 1969 af, en vertel die verhaal van ‘n 45-jarige Bond.
“1969. ‘n Veteraan- geheime agent. ‘n Enkele sending. Die mag om lewens te neem. James Bond is terug,” word lesers in ‘n verklaring belowe.
James Bond se skepper, Ian Fleming, is in 1964 dood ná hy 14 boeke oor dié geheime agent geskryf het.
Die reeks is egter deur talle ander skrywers voortgesit en meer as 100 miljoen James Bond-boeke is al verkoop.
Die jongste boeke was Sebastian Faulks se Devil May Care (2008) en Jeffery Deaver se Carte Blanche in 2011.
Die eerste Bond-roman, Casino Royale, is 60 jaar gelede, in 1953, gepubliseer.
Boyd het Fleming as karakter in een van sy vorige werke, Any Human Heart, gebruik en het ook al saam met Bond-akteurs soos Sean Connery, Pierce Brosnan en Daniel Craig gewerk.
– Volg Nuus24 op Twitter
- Sapa - AFP
