Nuwe Afrikaanse rolprent draai binnekort
2012-12-13 11:20
Kaapstad – Klein Karoo, 'n nuwe Afrikaanse romantiese komedie, sal binnekort by teaters landwyd begin draai.
Dit is die jongste film deur die gevierde akteur, regisseur en rolprentmaker Regardt van den Bergh, wie se vorige werk Faith like Potatoes, Tornado en Die Ongelooflike Avonture van Hanna Hoekom insluit.
Die rolprent speel af in die pragtige Swartberge buite Oudtshoorn en vertel die verhaal van Cybil Ferreira, 'n toegewyde jong onderwyser van Oudtshoorn, wat alles in haar vermoë sal doen om te verseker dat haar droom, om 'n ontspanningsentrum by die plaasskool Kalfiskraal te bou, bewaarheid word.
"Voor ek die draaiboek gelees het, het Cobus van den Berg, Tim Theron en Jorrie van der Walt my kom sien om uit te vind of ek sal belangstel in die projek," het Van den Bergh gesê.
"Hulle entoesiasme en die manier waarop hulle hulself vereenselwig het met die storie, het my van die begin af geboei. Die storie is vars en word vertel met eerlikheid en die plek waar dit afspeel, het my opgewonde gemaak. Ek het geweet dat ons 'n pragtige rolprent in die Klein Karoo sal maak."
Die rol van Cybil word gespeel deur die model en aktrise Donnalee Roberts, wat die rol van Annelie van 7de Laan vertolk.
Ander bekende plaaslike sterre wat ook in die rolprent te sien is, is Hykie Berg, Anel Alexander, Leandi du Randt, Marion Holm en Sisanda Henna.
Die rolprent word in Februarie 2013 vrygestel.
Kyk hier na die lokprent:
– Volg Nuus24 op Twitter
