Nuwe Afrikaanse TV-kanaal oppad
2009-10-10 06:41
Kaapstad - M-Net se Afrikaanse TV-kanaal, kykNET, kry kompetisie.
’n Splinternuwe Afrikaanse satelliet-TV-kanaal, Afrikaanse Satelliettelevisie (ASTV), begin van Maandag 2 November amptelik uitsaai en is reeds besig met toetsuitsendings.
ASTV, met sy hoofkantoor in Rustenburg, se TV-sein is gratis, hoewel kykers steeds ’n DStv-dekodeerder nodig sal hê omdat ASTV van meet af in digitale formaat uitgesaai sal word.
’n Dekodeerder moet in ’n paar maklike stappe heringestel word om ASTV as ’n bykomende TV-kanaal op te vang. Die nuwe uitsaaier spring volgende maand weg met meer oorspronklike plaaslike TV-programme in Afrikaans as toe kykNET presies ’n dekade gelede op DStv begin uitsaai het.
ASTV, wat reeds ’n webblad www.astv.co.za het, sê die uitsaaier sal “fokus op gehalte-gesinsvermaak, aktualiteitsprogramme, nuus en sport wat nasionaal uitgesaai sal word” en belowe dat “alle programme van die hoogste gehalte, nie-diskriminerend en ook opvoedkundig sal wees”.
Die nuwe nasionale kanaal het reeds ’n indrukwekkende programlys vir sy uitsaaiskedule wat, nes kykNET, deurlopend op verskillende tye deur die dag en week herhaal sal word. Daar is musiekprogramme soos Klankbaan (die aanbieder is nog onbekend) en My Storie, waarin kunstenaars die stories agter hul gewilde liedjies sal deel.
Leefstylprogramme sluit in Wat Maak Jy? oor tuisvlyt-idees, ’n kosprogram, Kos is Oppie Tafel met Cheree en Wynand Strydom, ’n visvangprogram getiteld Vaskap met die aanbieder Lourens Louwies, en Feesvoete met aanbieders Anel en Hans Drommedaaris, wat landwyd by feeste gaan kuier, ’n skoonheidsprogram, Eksie Perfeksie, en Loopbaan, met beroepsvoorligting vir leerders.
ASTV het ook kletsprogramme soos Joernaal en Ons Gesels Met waarin met plaaslike bekendes gekuier word.
Die kanaal sal elke dag met die godsdiensprogram Boekevat begin en eindig en sal ook kerkdienste, Afrikaanse musiekvideo’s en Afrikaanse musiekkonserte wat regstreeks opgeneem is, uitsaai.
- Die Burger