Nóg probleme vir Lindsay Lohan

2012-12-03 13:40

Los Angeles – Die aktrise Lindsay Lohan se belastingskuld is so erg dat die inkomstediens (IRS) beslag gelê het op al haar bankrekeninge om haar uitstaande skuld te vereffen, berig die skinderwebwerf TMZ.

Die belastinggaarder het Lohan gedagvaar vir 2009 en 2010 en beweer sy skuld $233 904 (sowat R2,1 miljoen) in onbetaalde belasting.

Die akteur Charlie Sheen het Lohan $100 000 (sowat R887 000) gegee om haar te help om haar belasting te betaal. Volgens die webwerf was dié bedrag skaars 'n druppel in die emmer, omdat Lohan ook geld vir 2011 skuld.

Bronne het aan TMZ gesê die aktrise is paniekerig oor haar finansiële situasie en is desperaat om geld te maak om uit die rooi te kom.

Die belastingskuld is nie Lohan se enigste probleem nie.

Die Liz & Dick-ster is aangekla nadat sy die fortuinverteller Tiffany Mitchell na bewering verlede week in 'n nagklub in New York geslaan het, is vroeër berig.

Lohan is glo gespanne oor haar regsprobleme en die swak resensies vir haar vertoning in die rolprent oor Elizabeth Taylor, wat verlede week in die Verenigde State begin draai het.

Sy het vroeër ook met die gereg gebots toe sy aan die polisie gesê het sy het nie haar Porsche bestuur toe sy in Junie betrokke was in 'n ongeluk nie. Lohan is ondermeer daarvan aangekla dat sy valse inligting aan die polisie verskaf het. Aanklagte van roekelose bestuur is ook teen haar aanhangig gemaak.

– Lees meer hier

– Volg Nuus24 op Twitter