Nog 'n SABC Survivor-glips
2009-11-24 07:50
Thinus Ferreira
Kaapstad - TV-kykers wat gereed sit om weer van Maandagaand Survivor te kyk, kan ’n skok te wagte wees: SABC3 gaan nié die volgende seisoen van die gewilde Amerikaanse realiteitsreeks uitsaai nie.
Die kanaal, wat die realiteitsprogramme The Amazing Race en Survivor om die beurt uitsaai, het nog nie die kontrak vir die nuwe seisoen, Survivor: Micronesia, met die internasionale verspreider onderteken nie.
Dit volg nadat SABC3 die finale uitsending van Survivor: China in September vir kykers bederf het en R60 000 se advertensiegeld moes terugbetaal.
SABC3 maak nou gereed om derderangse realiteitsreekse in die Survivor-kykgleuf uit te saai en begin Maandagaand met Momma’s Boys, gevolg deur Make Me a Supermodel.
Dit beteken dat Survivor eers middel April op die kassie sal wees.
’n SABC3-ingeligte het gesê SABC3 sal die begindatum dadelik naderskuif sodra ’n nuwe kontrak onderteken word.
SABC3 se amptelike antwoord was gister dat die uitsaaier “nie ’n nuwe Survivor aan die einde van die jaar wil begin en gedurende Desember op die lug wil hê nie’’.
Dit is baie goeie nuus vir M-Net se Suid-Afrikaanse weergawe, wat in die verlede weens toevallige skeduleringsplanne deur die twee uitsaaiers in dieselfde tydgleuf as die Amerikaanse weergawe op die lug was en moes meeding om kykersaandag.
M-Net se Survivor SA begin op 20 Januarie om 20:00 en word tans op Paradys-eiland aan die Mosambiekse kus by Inhassoro verfilm met sterre soos Cindy Nell en Christina Storm.
- Die Burger