Nóg 'n Kapenaar groet MasterChef

2012-05-23 07:30

Kaapstad – Die 41-jarige Samantha Nolan van Table View in Kaapstad is die eerste MasterChef-deelnemer in die top-10 wat haar tassies moes pak.

"Ek het baie pret gehad. Dit was 'n baie positiewe reis en ek sou dit nie anders verkies nie. Dit is iets wat my altyd sal bybly," het sy betraand ná die episode gesê.

Samantha het in die druktoets, saam met Khaya Silingile en Jade de Waal, 'n minestrone-sop voorberei en die beoordelaars was glad nie beïndruk met haar poging nie. Dié drie moes in ses stappe 'n waterige groentemengsel in 'n minestrone-sop verander.

Vroeër die dag moes die top-10, met 'n begroting van R150, 'n maaltyd vir vier mense voorberei. Abigail Donnelly, kosredakteur van die tydskrif Taste was die gasbeoordelaar.

Die beste maaltyd van die dag was dié van Manisha Naidu en Deena Naidoo se hoenderschnitzel het ook die beoordelaars laat smul van die lekkerte.

Khaya se hoenderporsies was te klein en haar geure was nie so goed soos in die vorige uitdagings nie. Jade het wéér in die druktoets beland omdat haar varkvleis-pasta ook teleurgestel het. Samantha se forel het haar lelik in die steek gelaat en haar aspersies was te min gekook.

In die druktoets het Samantha haar panchetta (dis soos gebiltongde varkvleis) opgesny en die geur van dié vleis het haar sop oorskadu. Khaya het die beoordelaars letterlik na hul asems laat snak toe sy per ongeluk koljander in plaas van pietersielie in haar sop gegooi het en die geure in Jade se sop het mekaar goed gekomplimenteer. Samantha was uiteindelik die een wie se MasterChef-reis kortgeknip is.

MasterChef South Africa word Dinsdae om 19:30 op MNet uitgesaai.

– Volg Nuus24 op Twitter

- Nuus24