Ndaba skep dansproduksie vir Jazzart
2010-09-02 08:43
Jazzart-dansteater se nuwe dansproduksie iHaw’ Elisha word Vrydag in die Kunstekaap-teater geopen.
Die stuk is met lof op die Danssambreel in Johannesburg ontvang.
Die choreograaf Sbonakaliso Ndaba vertel in ’n persverklaring: “Die Jazzart-dansers kwyt hulself uitstekend van hul taak om die buitenste lae af te skil, om hulself gestroop van die werklike lewe te laat – teer, ontbloot en pragtig.”
Ndaba verduidelik dat hoewel daar geen verhaal is om as agtergrond te dien nie, gehore steeds aanklank sal vind by die onderliggende konsep: die naspoor van die skaakspel van die lewe.
Sy vertel: “Daar is oral in die stuk beelde van skaak, omdat ek die lewe altyd beskou as georkestreer deur iemand of iets wat hoër as ons almal is.
“As mense vertroud is met skaak sal hulle verstaan dat elke beweging ’n ander skuif ontlok en uiteindelik elke stuk op die bord raak.”
“My bedoeling was om ons gemeenskaplike menslikheid te ontbloot in vlugtige terugblikke.
“Dit verken die wyses waarop ons dinge sien en doen, sowel as ons gebare, ons wese, ons goeie en slegte gewoontes.
“Die dansers, wat bekend is vir hul kragtige fisieke vermoëns sowel as hul sielvolle interpretasies, is werklik opgewasse vir hierdie uitdaging,” voeg sy by.
Sy is opgewonde oor die nuwe danswoordeskat wat sy en haar dansers ontwikkel het.
Ndaba glo om te leef en te dans staan in die hedendaagse Suid-Afrika sentraal tot die interpretasie van hierdie lewenservarings.
Sy wil hierdie ervarings in nuwe momente omskep wat met plaaslike gehore sal resoneer.
’n Nuwe klankbaan deur BLK Sonshine se Neo Muyanga is spesiaal in opdrag vir die Kunstekaap-speelvak geskep.
Ndaba het haar professionele loopbaan gevestig as danser en onderwyser by die Jazzart-dansteater van 1994 tot 2001.
In 2001 het sy na Durban teruggekeer om weer die Phenduka-dansteater opte rig.
Haar innoverende benadering tot dans het aan haar verskeie vooraanstaande toekennings vir choreografie besorg, insluitend die 2000- FNB Vita-toekenning as belowendste choreograaf, die 2003-DaimlerChrysler-toekenning vir Suid-Afrikaanse choreografie en die 2005 KwaZulu-Natal Dance Link-toekenning vir die beste choreograaf.
Haar onlangse verpligtinge sluit in die choreografeer van die openingseremonie van die Harare-internasionale kunstefees, Aïda vir Kaapstad Opera en Poet and Prophetess vir die Norrlands Operan wat in Umea, Swede ’n première beleef het.
iHaw’ Elisha het ’n speelvak van nege vertonings. Dit duur tot Sondag 12 September. Aandvertonings is om 20:15 op 3 en 4 September en weer op 9, 10 en 11 September.
Daar is ook middagvertonings om 15:00 op Saterdag 4 en 11 September en vroeg-aandvertonings om 18:00 op Sondag 5 en 12 September.
Kaartjies kos R50. Bespreek by Computicket of Kunstekaap se Bel-’n-Sitplek by 021421695.
- Die Burger