‘Naaimasjien’ stik steeds voort
2010-08-03 09:15
Volksblad
Die Naaimasjien stik so flink voort soos ’n splinternuwe Bernina.
Dié solostuk met Sandra Prinsloo het verlede week sy 100ste vertoning op die Dolosfees op Richardsbaai gevier. Die res van die jaar se program is ook propvol met vertonings van Malmesbury tot Windhoek.
“Liefde met die eerste oogopslag.” Sé beskryf die teaterregisseur Hennie van Greunen sy eerste reaksie op die teks van Die naaimasjien.
“Ek was ’n beoordelaar vir die Nagtegaal-teksprys in 2008. Toe ek Die naaimasjien klaar gelees het, het ek onmiddellik die organiseerders gebel en gesê ek wil dit hê!”
Wat hy toe nie geweet het nie, was dat Rachelle Greeff die skrywer is en die teks inderdaad daardie jaar die Nagtegaal-prys sou wen.
“Dit is beslis een van die sterkste tekste wat ek nog in Afrikaans gesien het,” sê Van Greunen.
“Ek dink dit is gewild omdat dit wye aanklank vind. Sentraal staan ’n nostalgiese afskeid, wat terselfdertyd ’n afskeid van ’n soort lewenstyl is waarmee ons ons kan vereenselwig.
“Party dae is ek self verstom oor die gewildheid as jy in ag neem dat dit 75 minute is van ’n ou tannie wat sit en praat!”
Van Greunen sê hy het baie oudisies gehou vir die rol van Magdaleen. “Maar Prinsloo het skaars drie reëls gelees toe het ek geweet ons voel dieselfde oor die teks en die karakter.”
Hoewel die toerprogram soms druk is, sê Prinsloo sy kan dit volhou omdat sy gesond is en stamina het.
- Volksblad