Musikant sterf aan oordosis morfien
2010-06-22 09:52
Los Angeles – Die baskitaarspeler van die swaarmetaal-groep Slipknot het gesterf nadat hy “per ongeluk” ‘n oordosis morfien en fentanyl, ‘n sintetiese plaasvervanger vir morfien, geneem het, het polisie in Iowa Maandag gesê nadat die uitslag van die nadoodse ondersoek vrygestel is.
Paul Gray, 38, se lyk is op 25 Mei by ‘n hotel naby Des Moines in Iowa gevind.
Die groep is bekend daarvoor dat hulle in skrikwekkende maskers verskyn, mekaar op die verhoog slaan en hul aanhangers “wurms” noem.
Grey was in 1995 medestigter van die groep.
‘n Nadoodse ondersoek het ook getoon dat Grey aan ‘n hartsiekte gely het, het ‘n verklaring van die Urbandale polisiedepartement gesê.
Ná Gray se dood het die oorblywende agt lede van die groep hul aanhangers geskok deur vir die eerste keer in die openbaar te verskyn sonder hul maskers om hul medelye aan Grey te betoon.
Grey se vrou Brenna, wat swanger is met hul eerste kind, was saam met hulle.
Die groep het ook bekendheid verwerf vir hul vertonings waarin hulle soms mekaar se bene gebreek het, mekaar aan die brand gesteek het en hul aanhangers beseer het deur in die skare in te duik.
Volg Nuus24 op Twitter
- Reuters