'Musikale reus' Robin Gibb sterf
2012-05-21 07:15
Londen – Die Bee Gees-ster Robin Gibb het Sondag ná 'n lang stryd met kanker in die ouderdom van 62 gesterf, het sy familie gesê.
"Die familie van Robin Gibb van die Bee Gees kondig met groot hartseer aan dat Robin ná sy lang stryd met kanker en 'n operasie aan sy ingewande oorlede is," lui 'n verklaring.
Barry, Maurice en Robin Gibb het in die 1970's treffers gehad soos "How Deep Is Your Love", "Stayin' Alive", en "Night Fever".
Die groep het sedert hul eerste treffers in die 1960's vrygestel is, meer as 200 miljoen albums verkoop.
Gibb het 18 maande gelede 'n operasie vir 'n onverwante kwaal ondergaan, maar 'n gewas is gevind en kolon- en lewerkanker is by hom gediagnoseer.
In Februarie vanjaar het Gibb gesê hy het “skitterend” herstel, maar sy gesondheid het kort daarna agteruitgegaan.
Die sanger was verlede maand in 'n koma nadat hy longontsteking opgedoen het, maar hy het weer herstel.
Hy het tot onlangs met sy vrou, Dwina, en sy seuns, Robin-John en Spencer, gekommunikeer deur sy sy oë te knip nadat dokters 'n trageotomiebuis in sy keel geplaas het.
Gibb is op 22 Desember 1949, sowat 'n halfuur voor Maurice, gebore.
Hy word oorleef deur sy vrou, Dwina Murphy-Gibb, en sy drie kinders, Spencer, Melissa en Robin-John.
Gibb was vanaf 1968 tot 1980 met Molly Hullis getroud voor hy later met Murphy-Gibb getroud is.
Verskeie musikante het hul medelye aan die familie betuig.
Die Kanadese rocker Bryan Adams het op Twitter geskryf: "Robin Gibb RIP. Baie hartseer om te hoor dat nog 'n wonderlike sanger so jonk dood is."
Mick Hucknall van Simply Red het Gibb as 'n "musikale reus" beskryf, terwyl Duran Duran ook hul medelye aan die familie betuig het.
"Rus in vrede, Robin Gibb. Dankie vir die musiek," het Sony Music in 'n verklaring gesê.
– Volg Nuus24 op Twitter
- AFP
