Museum moet dalk deure sluit
2011-03-14 09:07
Kaapstad - Die tweede grootste museum in die land, Grahamstad se Albanymuseum, sal dalk weens hoë eiendomsbelasting sy deure moet sluit.
Die museum wat in 1855 gebou is, is 'n toeriste-attraksie in die historiese Oos-Kaapse stad.
Dit help ook om kinders van agtergeblewe gebiede op te voed, veral tydens die Nasionale Kunstefees en die Wetenskapsfees.
Die bestuur van die museum sê hulle het verskeie briewe aan die Makana-munisipaliteit geskryf om verligting te kry, maar tot dusver nog niks bereik nie.
Hulle voer aan dat twee-derdes van die jaarlikse toewysing van die regering aangewend word om die munisipale heffings vir die museum se vier geboue te betaal.
Volgens Bongani Mgjima, bestuurder van die museum, sal dit tot nadeel vir die stad wees indien die museum sy deure moet sluit.
- Vir meer inligting besoek RSG.
- Volg Nuus24 op Twitter.