MultiChoice nou tjoepstil oor porno
2010-03-11 07:06
Thinus Ferreira, Die Burger
Kaapstad - MultiChoice is nou tjoepstil oor DStv se porno-planne, terwyl sy komende mededinger, On Digital Media (ODM), ook nie ’n woord wil rep oor die moontlikheid dat sy TopTV-diens sekskanale gaan aanbied nie.
Die Burger het Woensdag van ingeligtes by MultiChoice verneem dat dié betaal-TV-diens deur ’n magdom ontstoke intekenare, belangegroepe en lede van die publiek oorval is nadat Die Burger berig het dat MultiChoice marknavorsing oor pornografiese TV-kanale doen en die moontlikheid van sekskanale op die DStv-boeket oorweeg.
MultiChoice het toe gesê die seksboeket word oorweeg omdat “MultiChoice die afgelope paar maande oorval is deur versoeke vir volwasse inhoud op DStv’’.
Intussen het Helpende Hand, Solidariteit se gemeenskapsinisiatief – wat dadelik ’n “Nee vir Pornografie’’-veldtog begin het – Woensdag gesê meer as 41 000 Suid- Afrikaners het reeds hul stemme by die veldtog gevoeg. Helpende Hand gaan binnekort ’n protesdokument aan MultiChoice oorhandig.
“Die reaksie was verstommend,’’ het ’n MultiChoice-ingeligte gesê oor die reaksie wat reeds van die publiek ontvang is. “MultiChoice is oorweldig deur die porno-bohaai.
“Daar was soveel kommentaar en e-posse wat ingestroom het. Niemand het dié fel reaksie verwag nie.’’
MultiChoice wou nie antwoord op Die Burger se vraag wanneer hy finaal gaan besluit oor sekskanale – wat ’n kombinasie van sagte en harde pornografie kan insluit en as ’n aparte intekenaar-boeket sou funksioneer – nie.
Hy wou ook nie sê watter reaksie hy tot dusver ontvang het nie. “Die situasie het nie verander sedert ons laaste kommunikasie nie. Ons sal jou op hoogte hou sodra ons ons finale besluit geneem het.’’
ODM, wie se TopTV-satellietdiens in Mei gaan begin, trap nou ook katvoet en wou ook nie uitwei oor moontlike porno-planne en of kykers sekskanale in die beskikbare boeket sal kan kies nie.
“Ons sal ons finale produk binne twee weke aankondig en sal ook dan (die kwessie van) volwasse kanale hanteer,’’ het Vino Govender, ODM-direkteur, gister gesê.
- Die Burger