Moederstad is byna gereed vir U2-konsert
2011-02-09 07:08
Theuns van der Westhuizen
Kaapstad - Die Kaapstad-stadion, ’n reuse-verhoog, 150 skeepshouers vol toerusting, ’n paar duisend sekerheidsbeamptes en ander werkers, en 72 000 pret- en plesiersoekers.
Dít is van die bestanddele wat nodig is vir die supergroep U2 se konsert aanstaande Vrydagaand hier.
Die Kaapse stadsraad se span wat die stadion bestuur, werk reeds sedert die naweek om die stadion vir die konsert reg te kry.
Tonne gras is reeds van die speelveld verwyder en konstruksie van die verhoog van 8 000m² gaan binnekort begin.
Justin van Wyk van Big Concerts, die maatskappy wat U2 ná ‘n afwesigheid van 12 jaar weer na Suid-Afrika bring, het Dinsdag gesê byna 70 000 van die kaartjies vir die konsert is al verkoop. “Daar is dus nog so 2000 kaartjies vir laatslapers.”
Hy het verduidelik meer as 50 000 konsertgangers sal op die paviljoene sit. Net 17 000 kry staanplek voor die reuse-verhoog op die veld.
“Die verhoog is ’n struktuur van sowat 200 ton wat 50 m die lug in reik. Die toerusting vir die verhoog, asook vir die orkes, is in 150 skeepshouers gebring van Australië, waar U2 in Desember op toer was.”
Big Concerts het 100 vragmotors gehuur om die toerusting vir die konserte tussen Johannesburg en Kaapstad te vervoer.
“Dit is alles die moeite werd. Die twee konserte vergelyk goed met van die bestes en die grootstes in die wêreld.”
Die U2-geselskap bestaan uit meer as 300 mense. “Hulle kom met hul gesinne, dokters, fisioterapeute, sjefs, veiligheidspersoneel en selfs geestelike raadgewers. Dit is ’n selfonderhoudende dorp wat om die wêreld reis.”
Gevra oor die ekonomiese impak van die konserte, het hy gesê: “U2 gaan sowat R20 miljoen by plaaslike verskaffers bestee. Dit skep werk vir baie mense. Ons het ook 2 000 tot 3 000 mense wat ons help. Só leer hulle om ’n groot konsert aan te bied.”
Volg Nuus24 op Twitter
- Die Burger