Modern Family-ster se ma vertel van seksdaad
2012-11-09 10:13
Los Angeles – Die Modern Family-ster Ariel Winter se ma hou vol sy het haar dogter nie mishandel nie, en sê die 14-jarige het dié bewerings versin omdat sy kwaad is vir haar, berig TMZ.
Ariel het vroeër beweer dat haar ma haar fisiek en emosioneel mishandel, en 'n regter het haar tydelik in haar suster, Shanelle Gray, se sorg geplaas.
Chrystal Workman, die jong ster se ma, beweer Ariel is kwaad vir haar omdat sy haar belet het om met haar 18-jarige kêrel seks te hê.
“Ek is baie lief vir my dogter. Ek sal haar nooit op enige manier mishandel nie en ek het nog altyd my bes probeer om haar te beskerm en om te doen wat reg is vir haar," het sy aan die publikasie gesê.
"My veertienjarige dogter gaan uit met 'n man van agtien en 'n half jaar, en toe ek hulle uitgevang het terwyl hulle besig was met gedrag wat my dogter fisiek en geestelik te jonk is om te verstaan en begryp, het ek dit dadelik stopgesit."
Chrystal het nie die identiteit van die kêrel bekend gemaak nie, maar het gesê sy het 'n saak by die polisie teen hom geopen.
"Hy is volgens wet 'n volwassene en as hy volwasse dinge met 'n minderjarige doen moet hy ook bereid wees om volwasse gevolge vir sy dade te dra," het sy gesê.
Workman het volgens die polisieverslag op die aand van die 24ste September vir Ariel en haar kêrel in die bed betrap in haar huis se gastekamer.
– Lees hier meer.
– Volg Nuus24 op Twitter.
