Model verkoop kuns om van eks te vergeet

2010-09-07 13:34

Londen –Die Amerikaanse model en aktrise Jerry Hall gaan kunswerke uit haar private versameling verkoop in ‘n poging om oor haar verlede met haar eksman, Mick Jagger, te kom.

Veertien kunswerke sal op 15 en 16 Oktober by ‘n veiling verkoop word wat saam sowat R18 miljoen werd is.

Die hoogtepunt is ‘n portret deur Lucian Freud getiteld Eight Months Gone.

Dié kunswerk beeld Hall uit toe sy in 1997 agt maande swanger was met haar vier kind, Gabriel.

Andy Warhol se Dollar Sign sal ook onder die hamer gaan.

Warhol het glo dié kunswerk vir Hall gegee nadat sy met die vervaardiging van sy televisieprogram, Warhol TV, gehelp het.

“Ek beweeg aan. Ek dink dit gaan oor om van die verlede af los te kom,” het Hall (54) oor die veiling gesê.

“Op ‘n sekere ouderdom wil jy net ontslae raak van dinge. Dis goed om in die oomblik te wees en te verander. Ek is nie bang vir verandering nie.”

Sy was met Jagger, die voorsanger van die Rolling Stones, in die 1990’s getroud.

Volg Nuus24 op Twitter.
 

- Reuters