Mode-ghoeroes gons oor Wittstock-rok
2011-06-20 08:59
Kaapstad - Mode-ghoeroes bespiegel wyd en syd watter voorkoms Suid-Afrika se eie prinses vir haar groot dag gaan kies.
Die Olimpiese swemmer Charlene Wittstock trou op 2 Julie met prins Albert II van Monaco, in dié koninkryk aan die Franse Riviera.
“Dit gaan ’n interessante ene wees,” het die Kaapse ontwerper Paul van Zyl, gesê. “Sy sal beslis meer vryheid as Kate (Middleton) hê.”
Hy vermoed die rok gaan meer modieus wees as die een wat dié bruid van prins William van Brittanje gedra het. “Tog sal sy respek vir die koningshuis hê.”
Wittstock het in ’n onderhoud vandeesweek op die TV-program Top Billing ’n uitrusting van die Suid-Afrikaanse ontwerper Terence Bray gedra.
Hy voorspel dat haar rok “skoon” lyne sal hê wat bietjie meer “slinky” is en hy dink nie sy sal haar sommer in ’n “pofrok” begewe nie.
Van Zyl was ’n groot aanhanger van prins Albert se ma, die rolprentster Grace Kelly, en hy meen Wittstock doen die styl-ikoon se naam gestand.
Die Johannesburgse ontwerper Gert Johan Coetzee stem nie saam nie. Hy meen Wittstock sal meer modebewus moet wees. “Mense wil van haar ’n styl-ikoon maak. Ek hoop sy het ’n stilis.”
Hy meen dit sal goed wees as haar trourok haar swemmer-skouers effens verbloem. Hy hoop sy dra ’n sjaal, of iets soortgelyks.
Luidens berigte sal die Italiaanse ontwerper Giorgio Armani die trourok ontwerp.
Volg Nuus24 op Twitter
- Die Burger