Minder kyk Grammy-toekennings

2013-02-12 10:57

Los Angeles –  Sowat 28,1 miljoen Amerikaners het die Grammy-toekennings op televisie gekyk, wat sowat 30% minder is as verlede jaar.

Sondag se uitsending was ten spyte van dié laer kykertalle egter steeds die tweede grootste televisiegehoor wat die Grammys getrek het sedert 1993.

Kritici was ook vol lof vir die program.

“Daar was goeie vertonings, wenners wat elke liewe trofee verdien het en min rede om ineen te krimp of te wens dat jy eerder Downton Abbey gekyk het,’ het Chris Richards van Washington Post geskryf.

Mikael Wood van The Los Angeles Times was vol lof vir die kleiner, intieme oomblikke soos Rihanna se prag-vertoning van Stay.

Rob Sheffield van Rolling Stone was veral opgewonde oor Taylor Swift se Alice In Wonderland-tema tydens die opening.

Die Grammy-toekennings in 2012 het sowat 39,9 miljoen kykers gelok en was die tweede grootste televisiegehoor ooit vir die toekennings.

Die goeie kykertalle vir 2012 se program was grootliks danksy die Britse sangeres Adele se terugkeer, en die dood van die ikoniese Whitney Houston ‘n aand voor die vertoning.

– Volg Nuus24 op Twitter
 

- Reuters