Mimi maak op 79 haar debuut in fliek
2012-01-24 07:00
Kaapstad – Net vyf maande voordat sy 80 word, maak die diva Mimi Coertse vanjaar haar rolprentdebuut.
“Fame at last!” het Coertse Maandag geskerts.
Sy was in die jare vyftig as operasanger wêreldberoemd, veral in Wene, Oostenryk. In dié land word vandag nog van haar as “unsere Mimi” (onse Mimi) gepraat.
“Na dese kan ek ook spog dat ek op die verhoog, op TV en in ’n rolprent karakterrolle vertolk het,” het Coertse gesê na aanleiding van die rol wat sy losgeslaan het in die rolprent Talent, waarvan die verfilming middel aanstaande maand begin.
Die rolprent is losweg gegrond op die ware verhale van vier plaaslike kunstenaars wat in baie moeilike omstandighede uitgestyg het en naam gemaak het, het Johan Swanepoel van Trio-produksies gesê. Hy het die draaiboek geskryf en is ook die regisseur.
Dit is juis die aangrypende verhaal van James Bhemgee, ’n straatveër van Kaapstad wie se puik stem ontdek is terwyl hy strate gevee het, wat tot Coertse se rol gelei het. Bhemgee was uiteindelik die wenner van SA’s Got Talent in 2010.
In Talent is dit ’n vullisverwyderaar wie se stem ontdek word terwyl hy asdromme leegmaak. Coertse vertolk die rol van Anne Duval, wat die jong sanger (vertolk deur Kevin Leo) onder haar vlerk neem en hom tot roem lei.
Nog drie soortgelyke verhale wat volgens Swanepoel “deels fiksie en deels feite” is, speel hulle in die rolprent af. Uiteindelik beland al vier die mense in ’n talentkompetisie met ’n prysgeld van R1 miljoen.
Ander bekendes wat in die rolprent speel, is Frank Opperman, Paul du Toit, Elma Postma en Helene Lombard.
Coertse het gesê sy het “vroeër jare” in ’n paar rolprente verskyn, maar nie as ’n karakter nie. “Ek het myself gespeel en het gesing. Hierdie is my debuut in ’n karakterrol.”
– Volg Nuus24 op Twitter
- Die Burger