Michelle Obama geniet middagete in die Moederstad
2011-06-23 16:58
Kaapstad – Die Amerikaanse presidentsvrou, Michelle Obama, het Donderdagmiddag by ‘n restaurant in Woodstock, Kaapstad, middagete geniet.
Obama, wat saam met haar ma en twee dogters in die land is, het slaai, lemonade en ystee by die gewilde deli en restaurant The Kitchen geniet.
Sy het daarna na die Universiteit van Kaapstad vertrek, waar sy studente en jongmense sou toespreek.
Karen Dudley, eienaar van The Kitchen, het aan Channel24 gesê dat Obama se sekuriteitspan die restaurant vroeg Donderdagoggend besoek het om die personeel in te lig dat sy moontlik die restaurant later die dag sal besoek.
Volgens Dudley het Obama, tesame met die Amerikaanse ambassadeur en personeel van die Amerikaanse ambassade, ongeveer 12:30 by die restaurant opgedaag.
“Dit was ongeveer 20 mense wat by die restaurant opgedaag het. Ons het nie enige van ons ander kliënte weggejaag wat reeds by die restaurant was nie. Niemand van buite was egter toegelaat om die restaurant binne te kom nie."
Obama se laaste stop sal by die Kaapstad-stadion wees, waar sy aartsbiskop Desmond Tutu gaan ontmoet voordat sy Saterdag na Botswana sal vertrek.
- Channel24.
- Volg Nuus24 op Twitter.