Michael Jackson verdien meeste van dooies
2010-10-26 16:32
Los Angeles - Michael Jackson het altyd gesukkel om sy rekeninge te betaal.
Tog, 16 maande ná sy dood op die ouderdom van 50, is die Koning van Pop boaan die lys van dooie bekendes wat die meeste geld verdien, het die Forbes-besigheidstydskrif gesê.
Sy boedel het van Oktober 2009 tot Oktober 2010 $275 miljoen (ongeveer R1,9 miljard) ingesamel - meestal uit sy musiekkatalogus, die fliek This is It wat gebaseer is op die verfilming van sy repetisies vir ‘n reeks konserte wat hy nooit kon uitvoer nie en die verkope van sy eie CD’s.
Elvis Presley se boedel is in die tweede plek, met $60 miljoen (ongeveer R414 miljoen) wat uit die toeriste mekka Graceland, ‘n vertoning in Las Vegas en die bemarking van sy musiek verdien is.
JRR Tolkien, die skrywer van Lord of the Rings, is met $50 miljoen (ongeveer R345 miljoen) nie ver agter nie.
Volgende op die lys is Charles Schulz, skepper van die Peanuts-strokiesprente, en die Beatle John Lennon. Hulle word gevolg deur die Sweedse skrywer Stieg Larsson, skrywer van The Girl with the Dragon Tattoo.
Om ‘n plek op dié lys te kry, moet ‘n bekende nadoods minstens $5 miljoen (ongeveer R34 miljoen) verdien in die Oktober-tot-Oktober-tydperk.
- Volg Nuus24 op Twitter
- Sapa - AP