Michael Jackson se doodsbed word opgeveil
2011-11-10 09:06
Los Angeles – Die ontslape Koning van Pop, Michael Jackson, se doodsbed is onder ‘n hele paar items wat opgeveil gaan word.
Die koningingrootte bed waarop die Thriller-sanger op 25 Junie 2009 sy laaste asem uitgeblaas het sowel as ander items in sy gehuurde huis in Los Angeles gaan volgende maand onder die hamer kom.
Julien’s-afslaers sal ook verskeie skilderye en antieke meubels van die huis opveil.
Jackson het sedert 2008 in die huis gewoon en het dit as ‘n basis gebruik terwyl hy hom voorberei het vir sy This is It-konserte wat in Londen sou plaasvind.
Die nuus van die veiling wat op 17 Desember gaan plaasvind kom slegs ‘n paar dae nadat dr. Conrad Murray, Jackson se persoonlike dokter, skuldig bevind is op ‘n aanklag van onvrywillige manslag in verband met die sanger se dood.
Murray word op 29 November gevonnis ek kan tot vier jaar tronkstraf in die gesig staar.
Die gehuurde huis is ook te koop maar dit gaan nie opgeveil word nie. Alhoewel die prys van die huis nie bekend is nie word die waarde van ander huise in dieselfde omgewing op $18 miljoen (sowat R143 miljoen) beraam.
– Bang Showbiz.
– Volg Nuus24 op Twitter.