Mej. SA het 'teen borsvergroting besluit'

2012-07-10 13:45

Kaapstad – Mej. SA, Melinda Bam, het erken sy het ‘n borsvergroting oorweeg, maar het glo daarteen besluit omdat sy nie “soos ‘n plastiekpop wil wees nie”, het die Pretoria News berig.

Nadat onlangse gerugte van ‘n borsvergroting en dat sy swanger is as redes gegee is vir hoekom sy aan die Mej. Wêreld-kompetisie onttrek het, het Bam besluit om daaroor te praat en sy is “meer vasberade as ooit” om as Mej. Heelal gekroon te word.

Bam het aan die koerant gesê die fokus van Mej. Heelal het die afgelope paar jaar verander en hulle is op soek na meer natuurlike skoonhede, ten spyte van onlangse bewerings dat die skoonheidskompetisie ‘n sexier kompetisie as Mej. Wêreld is.

In verband met die bewerings van ‘n borsvergroting het Bam gesê: “Ek gaan nie jok en sê ek het dit nog nooit oorweeg nie. Natuurlik het ek.”

Nietemin het sy teen dit besluit “want dit is belangrik vir my om natuurlik te bly”.

“Ek wil nie soos ‘n plastiekpop wees nie. Ek gaan nie foutvind met my lyf nie,” het sy aan die koerant gesê.

Bam het verder aan die Pretoria News gesê sy is ‘n sterker persoon ná die gerugte en dat sy dit nie “persoonlik opneem” nie.

– Pretoria News

– Volg Nuus24 op Twitter