Meer as 250 vertonings op fliekfees in Durban
2011-06-21 08:37
Kaapstad - Die 32ste internasionale rolprentfees in Durban open op 21 Julie met die première van Otelo Burning, ’n plaaslike branderryprent wat in Durban afspeel.
Meer as 250 vertonings is vanjaar deel van Suid-Afrika se oudste rolprentfees, wat tot 31 Julie in dié stad plaasvind.
Otelo Burning, van die regisseur Sara Blecher, speel in die laat jare 80 af en handel oor ’n klompie jong mans van die Durbanse township Lamontville, wat deur branderplankry aan die politieke geweld van hul tyd ontsnap. ’n Nuwe leefstyl wink vir elkeen, maar kan hulle hul morele verpligtinge agterlaat? Die hoofspeler is Jafta Mamabolo, wat die jong Kunene in die rampokker-rolprent Jerusalema gespeel het.
Van die jongste Suid-Afrikaanse rolprente sal op die fees die eerste keer plaaslik vertoon word.
Onder die prente is die Kaapstadse regisseur Oliver Hermanus se Skoonheid wat die Queer Palm op die afgelope Cannes-rolprentfees ontvang het en in die afdeling Un Certain Regard gedraai het.
Daar is ook die eerste vertoning van die Johannesburgse regisseur Charlie Vundla se How to Steal 2 Million, asook Damir Radonic se Taka Takata, waarin die komediant Trevor Noahte sien is. Zuko Nodada se The Dream sal ook draai.
Die Nederlandse regisseur Paula van der Oest se drama oor die Afrikaanse digteres Ingrid Jonker, Black Butterflies, draai die eerste keer in Suid-Afrika. Dit is verlede jaar in Kaapstad verfilm.
Ses rolprente van die ontslape Indiese regisseur Satyajit Ray (1921-1992) is deel van ’n spesiale fokus op hom.
Kanada se sterk rolprentjaar is ook in fokus. Vyf vollengte-prente, insluitend Denis Villeneuve se Oscarbenoemde Incendies, ’n uitdagende en emosionele besoek aan die Midde-Ooste en die blootlê van ’n gesin se donker geheime; Maxime Giroux se drama oor grootword, Jo For Jonathan; en Ed Gass-Donnelly se Small Town Murder Songs, oor ’n afgetrede polisieman wat by ’n moordraaisel betrokke raak, draai saam met drie dokkies uit dié land.
Onder die inskrywings uit die res van Afrika is Nigerië se Restless City van Andrew Donsunmu, Justin Chadwick se The First Grader van Kenia, wat handel oor ’n bejaarde wat homself vir gr.1 inskryf.
’n Talentkampus, slypskole en besprekings is ook op die program, asook die tweede Durbanse rolprentmark.
Volg Nuus24 op Twitter.
- Die Burger