Marita maak ’n Woordfees-draai
2012-02-08 09:00
Kaapstad – ’n Verrassing wag op boekliefhebbers by vanjaar se US Woordfees in die vorm van die gewilde skrywer Marita van der Vyver.
Van der Vyver, wat deesdae in Frankryk woon, tree op as beoordelaar vir die fees se WOORDtroFEE-toekennings en gaan ook as spesiale feesgas by ’n plaasmiddagete oor haar nuwe roman gesels.
Dié gesprek vind op 7 Maart op die Knorhoek-wynplaas plaas. Haar uitgewer, Riana Barnard, gaan die gespreksleier wees.
Van der Vyver het laat val dat sy die laaste hoofstuk van die boek, wat in Oktober by Tafelberg verskyn, eers die afgelope naweek voltooi het.
Die manuskrip is trouens nog so vars dit het nie eens ’n titel nie, het sy gesê. Die verhaal strek oor drie geslagte van ’n Afrikaanse familie – van Kaapstad in die jare dertig tot Lissabon in die jaar 2000.
Van der Vyver se Knorhoek-optrede verskyn nie in die Woordfees se gedrukte program nie. Lesers en feesgangers kan by Computicket bespreek vir dié optrede.
Nog ’n verrassing op die bygewerkte feesprogram is die teenwoordigheid van die Nederlandse teatergeselskap Theater van de Verloren Tijd. Die gewilde teateregpaar Sjon Brands en Dorith van der Lee ken meer as 600 gedigte in Nederlands, Vlaams en Afrikaans uit hul kop.
– Volg Nuus24 op Twitter
- Die Burger