Maree met 'Victoriabaai' gegroet
2011-02-21 07:03
Johannesburg – “Êrens in die groot Victoriabaai staan Lucas Maree vanaand saam met ons.”
Met dié woorde van Steve Hofmeyr het Afrikaanse sangers Saterdagaand hulde gebring aan een van die grootste geeste in Afrikaanse musiek.
Maree het ná maande sy stryd teen prostaatkanker verloor. Hy is Vrydag omstreeks 23:00 in die Hillondale-versorgingsoord in Bloemfontein oorlede.
Maree was sedert November net tien dae tuis en het die res van die tyd in die hospitaal deurgebring.
Hy het ook aan nierversaking gely.
Sy jare lange vriend Mathys Roets het voorgestel die sowat 16 sangers wat die aand op Kurt Darren se plaas naby Mookgophong (Naboomspruit) vir dié se verjaardag gaan optree het, begin met Maree se Victoriabaai.
Roets het die sangers, wat in ’n ry agter hom gestaan het, gelei in dié lied, terwyl mense in die skare plek-plek opgestaan het as teken van respek.
Op die groot skerms langs die verhoog en op die veld het foto’s van Maree se lewe en boodskappe van meelewing geflits.
“Ons gaan jou mis, Lucas,” het een boodskap gelui.
Roets het vertel hoe hy nog verlede week met Maree oor die foon gesels het.
“Toe ek Woensdagaand met hom gesels het, wou hy nie baai sê nie. Hy het heeltyd, net nadat hy wou aflui, nog gesels. Hy het eindelik omtrent vier keer baai gesê.”
Dit was die laaste keer dat hy en Maree gepraat het.
Hofmeyr het Maree beskryf as ’n “groot reus wat altyd plek gemaak het vir almal”.
Volg Nuus24 op Twitter
- Beeld