Idols pos Mara Louw ná vodka, rasklagtes
2011-01-19 08:13
Johannesburg - Mara Louw sal nie weer vanjaar deel wees van die Idols-beoordelaarspaneel nie.
Louw se plaasvervanger is glo reeds aangewys en is klaarblyklik ook ’n vrou en iemand wat in die musiekbedryf werk.
Die einde van Louw se betrokkenheid by Idols kom nadat die verhouding tussen haar en M-Net verlede jaar erg versuur het weens uitlatings wat sy oor die reeks gemaak het.
Louw het reguit gesê L’loyd Cele, wat tweede geëindig het, moes die reeks gewen het. Sy het verklaar die kompetisie is vol rassisme en dat daar slegs ’n swart wenner sal wees indien M-Net die regte op die reeks aan die SABC verkoop.
“Swartes het nie toegang tot DStv nie. Dus word ’n groot deel van Suid-Afrikaners uitgesluit. Wittes stem vir wittes en swartes trek aan die kortste ent,” het Louw ná die reeks aan ’n koerant gesê.
Kykers het ná die voorval Louw se kop geëis en daar is selfs verskeie groepe op Facebook gestig waar gevra is dat sy vervang moet word.
Louw is ook deur die loop van die reeks deur M-Net berispe omdat sy pynpille en drank gemeng het kort voor die opname van een van die episodes.
Sy het onsamehangende kommentaar gelewer en die f-woord gebruik (laasgenoemde is egter uitgesny en kykers het dit nie gehoor nie).
Louw was sedert 2003 by vyf Idols-reekse betrokke. Sy was in dié tyd dikwels in die nuus weens omstrede uitlatings en kykers het haar gereeld van rassisme beskuldig.
Dié omstredenheid het egter verlede jaar skerp toegeneem.
M-Net wou nie Dinsdag die gerugte bevestig of ontken nie.
“Ons sal waarskynlik môre (vandag) of Donderdag ’n aankondiging oor die beoordelaarspaneel doen,” het Lani Lombard, hoof van korporatiewe kommunikasie by M-Net gesê.
Louw kon nie vir kommentaar bereik word nie.
Volg Nuus24 op Twitter
- Die Burger