Mannie Manim bedank by Fugard-teater
2010-12-07 09:27
Die Burger
Kaapstad - Mannie Manim, uitvoerende direkteur van die Fugard-teater in Distrik Ses, het Sondag bedank.
Hy het op 2 Januarie vanjaar in die pos begin nadat hy van 1999 uitvoerende bestuurder van die Baxter-teatersentrum was.
Daar word reeds met ’n teaterbestuurder in Kaapstad onderhandel om die pos oor te neem.
Manim het gedurende die onrustige tydperk met gerugte wat die ronde gedoen het oor probleme by die teater nooit enige kommentaar gelewer nie.
Sy enigste kommentaar op sy bedanking was: “Ek wens die teater en almal wat daar werk sukses toe. Ek het niks verder om oor die saak te sê nie.”
Hy gaan sy loopbaan in die teater as vervaardiger en beligtingsontwerper op ’n vryskutbasis voortsit, lui ’n nuusverklaring.
Eric Abraham, stigter-vervaardiger en borg van die teater, het ’n kort mediaverklaring uitgereik waarin hy sê hy is dankbaar vir die werk wat Manim gedoen het om die teater gevestig te kry. Hy het bevestig dat die nuwe bestuurder binne ’n dag of twee aangekondig sal word.
Hy het bevestig dat die teater nie meer die tuiste is van die Isango Ensemble (voorheen die Isango Portobello-geselskap) nie en dat hulle die gebou verlaat het. Klaarblyklik is verskille tussen die teater en die Isango Ensemble opgelos.
Die Fugard-teater word volgende jaar as lokaal gebruik vir Die Kaptein se Tier, wat tydens die Suidooster-fees opgevoer word. Antjie Krog het Athol Fugard se toneelstuk The Captain’s Tiger vir dié geleentheid vertaal.
Volg Nuus24 op Twitter.
- Die Burger