Manlike model dagvaar Chris Brown, Drake

2012-08-21 14:35

Los Angeles – 'n Manlike model dagvaar Chris Brown en Drake en beweer hy het beserings opgedoen tydens 'n geveg in Junie waarin lede van albei kunstenaars se gevolg betrokke was. 

Romain Julien beweer hy het by 'n nabygeleë tafel gesit toe die sangers se gevolge glo op 14 Junie by die nagklub W.I.P. in Manhattan mekaar bygedam het. 

Hy het Maandag sy dagvaarding ingedien en beweer hy het 'n ernstige seningbesering aan sy regterhand opgedoen.

Julien het Brown en Drake se name in sy dagvaarding genoem asook die operateurs van die nagklub, Entertainment Enterprises Ltd.

Hy hou vol hulle moes beter sekuriteit by die klub voorsien het en moes nie alkohol aan mense bedien het wat reeds dronk was nie.

Dié regsaksie kom slegs dae nadat Entertainment Enterprises Ltd. se base 'n hofsaak van $15 miljoen (sowat R123 miljoen) teen die twee sterre gemaak het en hulle daarvan beskuldig dat hulle nie die geveg gestop het nie en die nagklub se naam bevlek het.

Die basketbalster Tony Parker is ook tydens die voorval beseer en dagvaar glo die nagklub se base.

– Contact Music.

– Volg Nuus24 op Twitter.