Mandela-portret haal rekordprys op veiling
2013-01-20 14:44
Johannesburg – 'n Portret van oudpres. Nelson Mandela het onlangs 'n rekordprys van R3,7 miljoen gehaal op 'n veiling by 'n ANC-fondsinsamelingsgeleentheid.
City Press berig dat dít die hoogste prys is wat ooit op 'n plaaslike veiling betaal is vir 'n kunswerk deur 'n lewende Suid-Afrikaanse kunstenaar.
Susan Shabangu, minister van minerale bronne, het die skildery, Charity Begins at Home deur Sifiso Ngcobo, namens 'n mynmagnaat gekoop.
Volgens die koerant was William Kentridge die rekordhouer. Sy tekening The Film is in 2011 vir R2,2 miljoen op 'n veiling verkoop.
Die enigste werk deur 'n lewende Suid-Afrikaanse kunstenaar wat wêreldwyd meer as R3,7 miljoen op 'n veiling gehaal het, was Kentridge se Preparing the Flute, wat twee jaar gelede in New York vir meer as R5 miljoen verkoop is.
Ngcobo het aan die koerant gesê 'n portret van pres. Jacob Zuma is in Desember tydens 'n ANC-dinee in Mpumalanga vir R1 miljoen aan 'n sakeman verkoop. Dié portret was die eerste in 'n reeks van 12 ANC-leiers.
Hy het gesê hy het 'n gedeelte van die wins van die veiling gekry en dat die ANC hom gevra het om nóg 'n Mandela-portret te skilder vir die bieër wat verloor het. Dié bieër sal ook R3,5 miljoen betaal.
– Volg Nuus24 op Twitter
- SAPA
