Mandela-foto opgeveil
2012-11-20 09:17
Johannesburg – 'n Foto van oudpres. Nelson Mandela, wat die Duits-gebore fotograaf Jurgen Schadeberg geneem het, sal Dinsdag in Johannesburg opgeveil word, berig The Times.
Die foto is in 1952 in die oudpresident se prokureurskantoor geneem en is vir tussen R30 000 en R40 000 waardeer.
Die foto is ingesluit in 'n versameling van kontemporêre kuns wat deur Stephan Welz & Company opgeveil gaan word.
Fred Scott van die veilingshuis het aan die koerant gesê die foto is deel van geskiedenis en kuns.
"Jurgen het Mandela uitstekend vasgevang in 'n rustige, nadenkende oomblik en dit maak die foto 'n kunswerk, sowel as 'n stukkie geskiedenis."
Die foto is geneem nadat Mandela en Oliver Tambo die eerste swart regspraktyk in die land geopen het.
Werke deur William Kentridge, Conrad Botes, Robert Hodgins, Wayne Barker, Norman Catherine, Simon Stone, David Koloane, Karl Gietl en Kendall Geers sal ook op die veiling te sien wees.
– Volg Nuus24 op Twitter
- SAPA
