Madonna ‘beslis nie’ in 2012 na SA
2011-12-28 10:53
Kaapstad. – Die popster Madonna kom nie in 2012 in Suid-Afrika toer nie, en gerugte wat Dinsdag die ronde op Facebook en Twitter gedoen het is onwaar.
Attie van Wyk, uitvoerende hoof van Big Concerts, het Dinsdag aan Die Burger gesê Madonna kom beslis nie in 2012 hierheen nie.
Hy wou egter nie sê of Big Concerts enige planne het om die sanger van treffers soos “Like a Virgin”, “True Blue”, “Open Your Heart”, “Take a Bow”, “La Isla Bonita”, “Hung Up” en vele ander binnekort na Suid-Afrika te bring nie.
“Al wat ek gaan sê, is dat sy beslis nie in 2012 na Suid-Afrika kom nie.”
Hy het gesê sy beplanning is goed op dreef, maar hy gaan niks sê nie omdat hy homself nie in die voet wil skiet nie.
Van die bekende musieksterre wat wel in 2012 deur Big Concerts na Suid-Afrika gebring word, is Usher, Michael Bublé, Sting, Roxette, Il Divo, Eagles en Moody Blues. Die Usher-konsert word net vir Johannesburg beplan.
Volg Nuus24 op Twitter.
- Die Burger
