Lucozade onttrek van Linkin Park-toer

2012-11-09 12:29

Kaapstad – Lucozade het aangekondig dat hy nie sy borgskap van die Linkin Park-toer verder aktief sal bemark nie ná ‘n vrou dood is toe steierwerk buite die Kaapstad-stadion ingegee het kort voor 'n vertoning van die groep.

Die vervaardiger van die energiedrankie, wie se produk op die steierwerk bemark was, het die besluit op sy webtuiste aangekondig.

“Hierdie was ‘n groot tragedie en ons is baie hartseer oor die voorval. Uit respek vir die slagoffers van hierdie ongeluk sal ons nie ons borgskap van die toer verder aktief bemark nie,” het die maatskappy op sy webtuiste gesê.

Altesaam 19 mense is ook in die voorval beseer, en 12 van hulle moes in 'n hospitaal opgeneem word.

Die tydelike struktuur was buite die stadion opgerig. Dit is voor die konsert ondersoek, en veilig verklaar.

Linkin Park sal op 10 November in Johannesburg optree.

– Volg Nuus24 op Twitter