Afrikaanse sanger-liedjieskrywer sterf
2012-09-10 07:05
Kaapstad – Die bekende Afrikaanse sanger en liedjieskrywer Louis van Rensburg het gesterf nadat hy verlede maand met longontsteking in die hospitaal opgeneem is, berig Maroela Media.
Van Rensburg (68) is verlede maand in die Garden City-kliniek in Johannesburg opgeneem en sy toestand het twee weke gelede verswak en hy is toe na die waaksaal oorgeplaas.
Hy het bekendheid verwerf met sy musiek vir die TV-reeks Ballade vir ’n enkeling. Hy het die liedjie "Voshaarnooi" uit dié reeks as een van sy beste komposisies beskou.
Van Rensburg het ook die klankbane vir verskeie ander TV-reekse, waaronder Bart Nel, Bosveldwinkel, Wielie Walie, Geknelde land, Meester en Arende geskryf. Die temamusiek vir die gewilde sepie 7de Laan kom ook uit sy pen, berig Beeld.
Hy het hom jare lank net op komposisie- en ateljeewerk toegespits, maar het het vroeër vanjaar teruggekeer verhoog toe.
Verskeie bekendes het hul medelye op die sosiale netwerk Twitter gedeel.
Die sanger Jakkie Louw het geskryf: "Skepper van ongelooflike lied voshaarnooi vandag oorlede. Louis v rensburg se musiek sal leef vir ewig. Rip."
"Die wonderlike, geëerde sanger, musikant, liedjieskrywer Louis van Rensburg is vanoggend na 'n kort siekbed oorlede. RIP gentle Louis," het die TV-aanbieder en aktrise Liz Meiring geskryf.
– Volg Nuus24 op Twitter
– Wat was jou gunsteling-komposisie deur Louis van Rensburg? Maak jou bydrae en deel jou medelye in die kommentaarvenster hieronder.
