Longontsteking glo rede vir aktrise se dood
2010-02-04 21:00
Los Angeles – Volgens ‘n nadoodse ondersoek het die aktrise Brittany Murphy gesterf weens longontsteking en die feit dat sy bedwelm was met voorgeskrewe medikasie.
Die lykskouer in Los Angeles het Donderdag dié resultate bekendgemaak.
Volgens Craig Harvey, woordvoerder, was die hoofoorsaak van Murphy se dood longontsteking gewees. Sy het glo ook ‘n tekort aan yster gehad en het verskeie voorgeskrewe medikasie gebruik.
Harvey wou nie uitbrei oor watter medikasie Murphy gebruik het nie. Volgens hom kan daardie inligting eers in die volledige verslag bekendgemaak word wat oor twee weke uitgereik sal word.
Murphy het op 20 Desember op die ouderdom van 32 jaar in haar huis in Hollywood Hills inmekaargesak. Volgens haar man en ma het Murphy nie haar voorgeskrewe medikasie misbruik nie en het sy ook nie ‘n eetversteuring gehad nie.
Hulle kon nie Donderdag vir kommentaar bereik word nie.
– Sapa, AP