Lohan wil rol van Liz Taylor vertolk
2012-01-11 10:01
Los Angeles – Die omstrede aktrise Lindsay Lohan is glo in gesprekke met Lifetime om die rol van Elizabeth Taylor in 'n nuwe film Elizabeth & Richard: A Love Story te vertolk.
Die film sal fokus op Taylor se romanse met die akteur Richard Burton, het die webwerf Deadline.com berig.
Die Cleopatra-ikoon, wat met sewe mans getroud was, het Burton glo as die liefde van haar lewe beskou. Sy het twee keer met hom getrou voordat hulle vir 'n tweede keer in 1976 geskei is.
Elizabeth & Richard: A Love Story sal deur Larry Thompson vervaardig word en Christopher Monger skryf die film.
Indien die 25-jarige Lohan wel gekies word vir die film, sal dit haar eerste verskyning op die silwerdoek wees sedert sy in 2010 in die film Machete verskyn het.
– iafrica.
– Volg Nuus24 op Twitter.