Lohan wéér in die sop oor gemeenskapsdiens
2011-10-21 13:21
Los Angeles – Lindsay Lohan het Donderdag twintig minute laat opgedaag vir die eerste dag van haar gemeenskapsdiens by 'n lykshuis.
Die omstrede aktrise kon glo nie die ingang van die Los Angeles-lykshuis vind nie. Lohan is deur die hof beveel om 16 uur per week gemeenskapsdiens te doen totdat sy weer op 2 November in die hof moet verskyn.
Steve Honig, haar woordvoerder, het bevestig sy sal Vrydag weer by die lykshuis aanmeld.
“Lindsay het ongeveer twintig minute laat by die lykshuis aangekom en sal môre (Vrydag) weer by die lykshuis aanmeld,” het Honig aan RadarOnline gesê.
“Sy was laat omdat sy nie geweet het watter ingang om te gebruik nie. Die media wat vir haar koms buite gewag het, het ook verwarring veroorsaak.
“Lindsay het met die oorsieners by die lykshuis gesels en hulle het haar gewys waar die ingang is. Alles is uitgesorteer,” het Honig gesê.
Die 25-jarige ster se voorwaardelike vrylating is Woensdag in die hof in Los Angeles teruggetrek. Sy is met boeie uit die hof weggelei en in polisieaanhouding geplaas. Borgtog van $100 000 (sowat R821 000) is vir haar vrylating betaal.
Regter Stephanie Sautner het besluit om Lohan se voorwaardelike vrylating terug te trek nadat sy ‘n paar sessies van haar gemeenskapsdiens by die Downtown Women's sentrum misgeloop het.
Die aktrise is beveel om gemeenskapsdiens as deel van haar vonnis te doen nadat sy in Januarie ‘n halssnoer van $2,500 (sowat R21 000) gesteel het.
Lohan kan tot 18 maande tronkstraf gevonnis word wanneer sy op 2 November weer in die hof verskyn indien sy skuldig bevind word dat sy haar proefvoorwaardes verontagsaam het.
– Bang Showbiz.
– Volg Nuus24 op Twitter.