Lohan soek nie Charlie Sheen as mentor

2013-03-04 15:59

Los Angeles – Lindsay Lohan het glo gesê dat sy dankbaar is vir die ondersteuning wat sy van Charlie Sheen ontvang, maar dat sy hom nie as ‘n mentor soek nie.

Lohan en Sheen is glo goeie vriende en was ook saam in Scary Movie 5 te sien.

Volgens TMZ wil die Mean Girls-ster egter nie vir Sheen as ‘n mentor hê nie.

Dit volg nadat Sheen verlede week aan TMZ gesê het dat Lohan 'n mentor in haar lewe kort om haar weer op die regte pad te bring, en dat hy die perfekte ou vir die werk is.

“Alhoewel sy dankbaar is vir al die hulp wat Sheen al vir haar gegee het, sal sy hom nooit as ‘n mentor vat nie,” het ‘n bron na aan die aktrise aan TMZ gesê.

Sheen het voorheen glo $100 000 (sowat R900 000) betaal om vir Lohan met haar belastingskuld te help.

Lohan se lewe bly bitter omstrede, met haar nuutste rolprent Liz & Dick wat erg deurgeloop het onder kritici.

Verlede week het ‘n regter ook besluit om nie klagtes teen Lohan terug te trek nie, wat beteken dat haar verhoor op 18 Maart sal voortgaan.

Lohan se saak hou verband met 'n ongeluk wat in Junie verlede jaar plaasgevind het. Die polisie het vasgestel dat sy gejok het toe sy aan hulle gesê het sy het nie die Porsche wat in die ongeluk betrokke was, bestuur nie.

Lohan is ondermeer daarvan aangekla dat sy valse inligting aan die polisie verskaf het. Aanklagte van roekelose bestuur is ook teen haar aanhangig gemaak.

– Volg Nuus24 op Twitter